२०भाद्र,धनगढीः नेपाल प्रिमियर लिग (एनपीएल) क्रिकेट प्रतियोगिताको दोस्रो संस्करणका लागि अस्ट्रेलियाका चर्चित खेलाडी क्रिस लिन सुदूरपश्चिम रोयल्समा आवद्ध भएका छन । लिनलाई सुदूरपश्चिम रोयल्सले आफ्नो टोलीमा समावेश गरेको हो । विदेशी खेलाडीका रूपमा क्रिस लिनलाई टोलीमा अनुबन्ध गरिएको सुदूरपश्चिम रोयल्सले जानकारी दिएको छ । ३५ वर्षीय क्रिस लिन प्रभावशाली ब्याट्सम्यान हुन् ।
लिनलाई टोलीमा अनुबन्ध गरेपछि आफूहरू उत्साही भएको क्लबले जनाएको छ । क्रिस लिनले अस्ट्रेलियाका लागि एकदिवसीय अन्तर्राष्ट्रिय र टी–२० अन्तर्राष्ट्रिय प्रतियोगिता खेलेका छन् । उनले चार एकदिवसीय अन्तर्राष्ट्रियमा कुल ७५ रन बनाएका छन् । यसैगरी, १८ टी–२० अन्तर्राष्ट्रियमा उनले कुल २९१ रन बनाएका छन् । यी दुवै ढाँचाको अन्तर्राष्ट्रिय क्रिकेटमा उनको उच्च स्कोर भने ४४ रन हो ।
क्रिस लिनले टी–२० क्रिकेटमा भने आठ हजारभन्दा बढी रन बनाएका छन् । यस क्रममा उनले ५ शतक र ५५ वटा अर्धशतक पनि प्रहार गरेका छन् । क्रिस लिन अस्ट्रेलियन बिग बास लिगमा सबैभन्दा धेरै रन बनाउने र सबैभन्दा धेरै छक्का प्रहार गर्ने ब्याट्सम्यान पनि हुन् । उनले इन्डियन प्रिमियर लिगसहित विश्वका धेरै फ्रेन्चाइज लिग पनि खेलिसकेका छन् ।
सुदूरपश्चिम रोयल्सका मालिक स्वतन्त्र प्रताप शाह भन्छन्, ‘बिग बास लिगमा प्रतिष्ठा कमाएका अस्ट्रेलियन खेलाडीलाई भित्र्याउने योजना हामीले पहिलो संस्करणदेखि बनाएको थियौँ । अहिले क्रिस लिनलाई भित्र्याउन पाउँदा निकै खुशी लागेको छ । उनको आगमनले नेपाल प्रिमियर लिगको प्रतिष्ठा पनि बढाउने छ ।’
क्रिस लिनले पनि एनपीएल खेल्न पाउँदा खुसी लागेको प्रतिक्रिया दिएका छन् । ‘म नेपाल प्रिमियर लिगमा खेल्न पाउँदा निकै उत्साही छु । नेपाली क्रिकेटप्रेमीहरूको माया पाउनेमा आशावादी छु । नेपालका प्रतिभाशाली खेलाडीहरूसँग खेल्न पाउनु रोमाञ्चक हुनेछ,’ उनले भनेका छन् ।
यो खबर पढेर तपाईलाई कस्तो महसुस भयो?
