३० असार,२०८२ : कञ्चनपुरको कृष्णपुर नगरपालिकाले स्वास्थ्य र शिक्षामा निरन्तर जनमुखी काम गर्दै आएको छ । नगरपालिकाले सञ्चालन गरेको ‘नागरिकसँग मेयर’ ( नसर्ने रोगको घरदैलो मै परिक्षण ) कार्यक्रम अन्तर्गत हालै सम्पन्न घरदैलो स्वास्थ्य परीक्षण अभियानमा ३२ हजार ५ सय ५५ बढी नगरवासीको स्वास्थ्य परीक्षण गरिएको छ ।

नगरप्रमुख हेमराज ओझाले २०७९ जेठमा निर्वाचित भएर आएपछि सुरुवातमै नगरको शिक्षा र स्वास्थ्यमा सर्वसाधारणको पहुँच र सर्भसुलभ बनाउने योजना सहित अगाडी बढ्ने प्रतिबद्धता व्यक्त गरेका थिए । सोहि अनुरुप अहिले नगरप्रमुख ओझाले कृष्णपुरका सामुदायिक विद्यालय र स्वास्थ्य चौकीको स्तरोन्ती गर्दै नगरबासीको मन जितिरहेका छन ।

नगरप्रमुख हेमराज ओझाको अग्रसरतामा कृष्णपुर नगरपालिकाले जनस्वास्थ्यलाई उच्च प्राथमिकता दिएको छ । ‘नागरिकसँग मेयर’ कार्यक्रम अन्तर्गत हालै सम्पन्न घरदैलो स्वास्थ्य परीक्षण अभियानमा ३२ हजारभन्दा बढी नगरवासीको स्वास्थ्य परीक्षण गरिएको छ, जुन यस क्षेत्रमै अभूतपूर्व मानिएको छ । आर्थिक वर्ष २०७९-०८०,२०८०- ०८१ र २०८१ – ०८२ गरेर नागरिकसँग मेयर कार्यक्रमको यो तेश्रो चरण हो । नागरिसँग मेयर कार्यक्रम अन्तर्गत आफ्नो घरमै आएर स्वास्थ्यक्रर्मीले आफ्नो स्वास्थ्य बारे बुझ्दा नगरबासीले खुशी व्यक्त गरेका छन । यो कार्यक्रम निकै प्रभावकारी रहेको भन्दै उनीहरुले यस कार्यक्रलाई निरन्तरता दिन नगरप्रमुख हेमराज ओझालाई भेटमा आग्रह गरेका छन ।

उक्त अभियानमा नगरका स्वास्थ्यकर्मीहरू, स्वयंमसेवक, वडा प्रतिनिधिहरूको समन्वयमा नगरका सबै वडामा सबै नागरिकका घरमै पुगेर नागरिकको स्वास्थ्य अवस्था परीक्षण गरियो । अभियानमा उच्च रक्तचाप, मधुमेह, युरिनमा प्रोटिनको मात्रा, कुष्ठरोग, टीबी, तथा खोप छुट भएका बालबालिकाको पहिचान गरी तुरुन्तै उपचार प्रक्रिया सुरु गरिएको छ ।

नगरप्रमुख ओझाको निर्देशनमा अब प्रत्येक वर्ष यस्तो स्वास्थ्य परीक्षण कार्यक्रम संस्थागत गरिनेछ । साथै, उनले कृष्णपुर स्वास्थ्य चौकीमा आइसियु सुविधा सहितको सर्पदंश उपचार सेवा सञ्चालनको तयारी गरिरहेको बताए । सर्पदंश जस्ता आकस्मिक स्वास्थ्य समस्यामा तत्काल उपचार होस् भनेर बजेट विनियोजनसहित पूर्वाधार निर्माणको काम अघि बढाइएको छ ।

यस्तै, नगरमा निःशुल्क ९८ प्रकारका औषधि, निःशुल्क एम्बुलेन्स सेवा, विशेष स्वास्थ्य शिविर लगायतका कार्यक्रमहरू सञ्चालनमा ल्याइएको छ । नगरपालिका परिसरमा रहेको कृष्णपुर स्वास्थ्य चौकीले २४सै घण्टा सेवा दिइरहेको छ ।स्वास्थ्य चौकीमा चेकजाँच गर्न आएका बिरामीले पर्चा देखि लिएर औषधी र प्रयोगशाला सेवा निशुल्क पाउँदै आएका छन । त्यसैगरी नगरपालिकाले एक जना मेडिकल अफिसरका रुपमा डा.दिलिप देउवालाई नियुक्त गर्दै निरन्तर सेवा प्रवाह गर्दै आएको छ । मेडिकल अफिसर सहित २४सै घण्टा सेवा दिइरहेको सम्भवत यो नेपालकै पहिलो स्वास्थ्य चौकी हो ।

स्वास्थ्य शाखा प्रमुख रतन सिंह विष्टले भने, “हामीले नगरका सबै वडामा पुगेर सेवा उपलब्ध गरायौँ। परीक्षणपछि देखिएका समस्या समाधानका लागि आवश्यक औषधि, परामर्श र रिफर सेवा पनि उपलब्ध गराइएको छ। यो कार्यक्रमले समुदायस्तरसम्म स्वास्थ्य सेवा पु¥याएको छ ।”

नगर उपप्रमुख द्रोपदी रानाले अभियानको सामाजिक पक्षलाई जोड दिँदै भनिन्, “हाम्रो अभियानले महिला, अपांगता भएका व्यक्ति, वृद्धवृद्धा र दीर्घरोगीहरूको स्वास्थ्य सुरक्षामा गम्भीर चासो देखाएको छ। यो मात्र कार्यक्रम होइन, जनताको विश्वास जित्ने माध्यम पनि हो।”

स्वास्थ्य परीक्षणका क्रममा उच्च रक्तचाप, मधुमेह, युरिनमा प्रोटिनको मात्रा, कुष्ठ र क्षयरोगका नयाँ केसहरू पहिचान हुनु तथा खोप छुट भएका बालबालिकालाई लक्षित उपचार प्रक्रिया सुरु गर्नु नगरको सार्वजनिक स्वास्थ्यप्रतिको प्रतिबद्धता दर्शक उदाहरण बनेको छ । कृृष्णपुर स्वास्थ्य चौकी व्यवस्थापन समितिका अध्यक्ष एव वडा न ५ का अध्यक्ष टेक पाण्डेयले भौतिक संरचना निर्माण तथा सडक,पुल पुलेसो भन्दा पनि नागरिकको स्वाथ्य महत्वपूर्ण भएकाले हाम्रो टिमले स्वास्थ्य क्षेत्रलाई गम्भिरताका साथ लिएर काम अगाडी बढाइ रहेको बताए ।

कृष्णपुर नगरपालिका स्वास्थ्य शाखाको आयोजनामा गत फागुनबाट सुरुवात गरिएको तेश्रो चरणको नागरिकसँग मेयर ( नसर्ने रोगको घरदैलो मै परिक्षण ) कार्यक्रमको सोमबार एक औपचारिक कार्यक्रमको आयोजना गर्दै समापन गरिएको छ ।

उक्त कार्यक्रम नगरप्रमुख हेमराज ओझाको प्रमुख आतिथ्यतामा सम्पन्न हुँदा सभापति कृृष्णपुर स्वास्थ्य चौकी व्यवस्थापन समितिका अध्यक्ष एव वडा न ५ का अध्यक्ष टेक पाण्डेय रहेका थिए ।

कार्यक्रममा विशिष्ट अतिथि नगर उपप्रमुख द्रोपति राना,अतिथिमा वडा सदस्यहरु चक्र रैकाल,लक्ष्मी सुनार लगायत कृष्णपुर नगरपालिकाका सबै स्वास्थ्य शाखा युनिटका कर्मचारी,स्थानीय र सञ्चारक्रमीहरुको उपस्थिति रहेको थियो ।

यो खबर पढेर तपाईलाई कस्तो महसुस भयो ?