भाद्र ८,धनगढी
१७ औं राष्ट्रिय पुस्तकालय दिवसको पूर्वसन्ध्यामा कैलाली जनपुस्तकालय धनगढी कैलालीले आयोजना गरेको खुल्ला हाजिरी जवाफ प्रतियोगीतामा २०८१ को
नवीन कुमार बम,आरती अवस्थी र अस्मिता चौधरीको समूह प्रथम भएको छ । यस्तै क्रमश नेत्र बोगटी, मुकेश बोगटी, कुबेर बढाइलाको समूह द्वितीय र
सन्तोष रावल, रणबहादुर साउद, सरोज जोशीको समूह तृतीय भएको छ । अत्यन्तै प्रतिस्पर्धात्मक बनेको प्रविधिमैत्री खुल्ला हाजिरी जवाफ प्रतियोगीतामा धनगढीका १२ समूह सहभागी थिए ।
प्रतियोगीतामा प्रथम हुने समूहले नगद रु ६ हजार प्रमाणपत्र सहित पुरस्कार प्राप्त गरेको छ । प्रथम पुरस्कारको प्रायोजन धनगढी शिवनगरमा रहेको चैतन्य लोकसेवाले गरेको छ । द्वितीय भएको समूहले नगद ४,५०० प्रमाणपत्र सहित पुरस्कार प्राप्त गरेको छ जस्को प्रायोजन कान्तिपुर कलेज काठमाडौँले गरेको थियो भने तृतीय भएको समूहले नगद रु ३००० हजार प्रमाणपत्र सहित पुरस्कार प्राप्त गरेको छ । जो पुरस्कार जन पुस्तकालयले स्वयमले प्रदान गरेको छ । त्यस्तै विजेता तिनै समूहलाई धनगढी हसनपुरमा रहेको समर्पण पुस्तक पसलले एक एक प्रति सामान्य ज्ञान प्रदान गर्ने भएको छ । विजेता तीनओटै समूहलाई आगामी भाद्र १५ गते आयोजना हुने १७ औं राष्ट्रिय पुस्तकालय दिवसको अवसरमा पुरस्कार प्रदान गरिने प्रतियोगीता संयोजक तथा जनपुस्तकालयका सहसचिव शुभाष संकल्प भण्डारीले जानकारी दिए ।
त्यसअघि एक औपचारिक कार्यक्रमका बीच खुल्ला हाजिरी जवाफ प्रतियोगीतामा २०८१ को सुदूरपश्चिम प्रदेश सरकारका अर्थ राज्यमन्त्रीले प्रकाश बहादुर बमले उद्घाटन गरेका थिए । उद्घाटन पश्चात राज्यमन्त्री बमले मान्छे जबसम्म शिक्षित हुँदैन तबसम्म उस्ले न भौतिक विकासको महत्व बुझ्दछ न त प्रयोग नै गर्न जान्दछ त्यसैले मान्छे शिक्षित हुन जरुरी रहेको बताए । उनले युवाशक्ती देशको भविष्य भएको भन्दै देशमै सम्भावना खोज्नुपर्ने र देशको सेवा गर्नुपर्नेमा जोड दिए ।
कैलाली जनपुस्तकालयका अध्यक्ष डा.टि.एन.जोशीको अध्यक्षतामा सम्पन्न उक्त कार्यक्रमको प्रमुख अतिथिमा सुदूरपश्चिम प्रदेश सरकारका अर्थ राज्यमन्त्रीले प्रकाश बहादुर बम रहेका थिए । कैलाली जनपुस्तकालयका सचिव टंक प्रसाद जोशीले कार्यक्रमको सञ्चालन गरेका थिए भने कार्यक्रको संयोजकको जिम्मेवारी सह सचिव शुभाष संकल्प भण्डारीले सम्हालेका थिए । त्यस्तै कार्यक्रमको प्राविधिक पाटो कैलाली जनपुस्तकालयका सदस्य हर्क बोहोराले हेरेका थिए ।
