धनगढी उपमहानगरपालिका वडा न.८ क्याम्पस रोडमा रहेको थ्री स्टार्स अंग्रेजी आवासीय विद्यालयका विद्यार्थीहरुले धनगढी १३ कैलाली गाउँमा रहेको निङ्लाशैनी संस्कृत गुरुकुल विद्यापिठलाई खाद्यान्न तथा शैक्षिक सामाग्री सहयोग गरेका छन । मंगलबार कक्षा १० मा अध्ययनरत ६५ जना विद्याथीहरुले विद्यापिठमा आफै उपस्थित भएर प्रधानाध्यपक खगेन्द्र राज अवस्थीलाई उक्त खाद्यान्न तथा शैक्षिक सामाग्री हस्तान्तरण गरेका हुन ।

खाजा खर्चबाट बचाएको रकम जम्मा गरेका विद्यार्थीहरुले चामल,दाल,तेल,तरकारी,नमकिनहरु र स्टेशनरी सामाग्री खरिद गरेर विद्यालयलाई सहयोग गरेका हुन । २०७१ सालमा स्थापना भएको उक्त निङ्लाशैनी संस्कृत गुरुकुल विद्यापिठमा हाल ३५ जना विद्यार्थी अध्ययनरत छन ।

विद्यापिठको आफ्नो निश्चित आयश्रोत नहुँदा सञ्चालनमा कठिनाई भैरहेका बेला थ्री स्टार्स अंग्रेजी आवासीय विद्यालयकाका विद्यार्थीहरुले गरेको सहयोगका लागि प्रधानाध्यपक खगेन्द्र राज अवस्थीले धन्यवाद व्यक्त गरेका छन । प्रअ अवस्थीले विद्यार्थीहरुलाई सामाजिक सेवामा लाग्नुपर्दछ भन्ने संस्कार थ्री स्टार्स अंग्रेजी आवासीय विद्यालयले प्रवाह गरेको भन्दै यसले समाजमा सकरात्मक प्रभाव पर्ने बताए ।

विद्यालयकी छात्रा दिपिशा सिंह र छात्र नितेश जफ्रेलले आफूले स सानो रकम जोगाएर जम्मा गर्दै यस्तो पवित्र ठाउँमा सहयोग गर्न पाउँदा अत्यन्तै खुशी लागेको बताए । उनीहरुले यस्ता सहयोगले समाजमा सकरात्मक सन्देश जाने भन्दै आफूहरुलाई पनि सन्तृष्टी मिलेको बताएका छन ।

उक्त सहयोग हस्तान्तरण कार्यक्रममा शिक्षक द्वय श्याम रोयला र धन बहादुर खडायतको पनि उपस्थिति रहेको थियो ।

२०६१ सालमा स्थापना भएको थ्री स्टार्स अंग्रेजी आवासीय विद्यालय पछिल्लो समय गुणस्तरीय शिक्षाका लागि पनि परिचित छ । २०८१ को एसइइ परीक्षामा यस थ्री स्टार्सबाट ५५ जना विद्यार्थी सहभागी भएकोमा ५५ जना नै उतिर्ण हुँदै शत प्रतिशत नतिजा हाँसिल गरेको थियो ।

यो खबर पढेर तपाईलाई कस्तो महसुस भयो ?