प्रधानमन्त्रीले संसद्को रोष्ट्रममा उभिएर रास्वपाका सांसदहरूको चरित्र-हत्या गरेको कत्ति सुहाएन ! कसले कति बिहे गर्यो ? कता डिभोर्स गर्यो ? भन्ने नितान्त व्यक्तिगत कुरा हुन् ! यदि गैर-कानूनीरुपमा बिहे गरिएका थिए भने निज-व्यक्तिहरूले आफैं सल्टाउने कुरा हो ! कानूनले हेर्ला नै ! देशको प्रधानमन्त्रीले टिप्पणी गरिरहने विषय होईन त्यो !

“…विदेशबाट फर्केका” भन्ने अर्को आक्षेप रहेछ ! विदेशबाट फर्किनु नै अपराध रहेछ त ? स्वदेशमै बसेर, देश खोक्रो बनाएर, जनताको रगत पसीना चुसेर, देशलाई कङ्गाल बनाउने भन्दा त विदेश गएर दुई-चार कुरा सिकेर, दुई-चार पैसा कमाएर स्वदेश फर्किनेहरू हजारौं गुणा असल होईनन् र ?? यदि उहाँले लक्षित गरेका व्यक्तिहरू विदेशकै नागरिकता लिएर नेपाल फर्केका हुन् भने पनि ती विदेशी नागरिकताधारीलाई नेपाल टेलिभिजनमा “जनतासित प्रधानमन्त्री” भन्ने कार्यक्रम चलाउने अनुमति दिने उहाँ नै हो नि ! विदेशी नागरिकताधारीलाई राष्ट्रिय टेलिभिजनमा हुलेर त्यस्तो राष्ट्रघाती काम उहाँले किन गर्नुभो ? तिनै मान्छेको नागरिकता र पासपोर्टको विवाद चल्दै गर्दा दुई-दुई पटक देशको गृहमन्त्री उहाँले नै बनाउनु भएको हो नि ! त्यस्तो देशघाती काम प्रधानमन्त्रीले किन गर्नुभो ? हिजो सत्ताको पार्टनर हुने बेलामा संसदमै उभिएर त्यस्ता मान्छेको बचाऊ किन गर्नुभो ? हिजो कांग्रेसले राजिनामा माग्दा पनि किन बचाऊमा उत्रिनुभो ? विदेशबाट फर्केका त्यस्ता गडबड मान्छेलाई सत्ताको पार्टनर किन बनाउनुभो ? कि त, उहाँको समर्थन गरून्जेल जे पनि, जस्तो पनि सही हुने, अनि उहाँसित असहमति जनाउने जति सबै खराब, देशघाती हुने हो ?