माघ १४,धनगढी :यहि जनवरी ३० देखि फेब्रुअरी ७ सम्म कीर्तिपुरस्थित त्रिवि क्रिकेट मैदानमा हुने नेपाल, नेदरल्यान्ड्स र थाइल्यान्ड सम्मिलित त्रिकोणात्मक शृंखलाका लागि नेपाली टोलीको घोषणा भएको छ ।
घरेलु मैदानमा आयोजना हुने त्रिकोणात्मक शृंखलाका लागि आइतबार इन्दु बर्माको कप्तानीमा १५ सदस्यीय टोलीको घोषणा गरेको हो । नेपाल क्रिकेट संघ क्यानले सार्वजनिक गरेको १५ सदस्यीय टोलीमा सुदूरपश्चिम प्रदेशमा घर भई विभिन्न प्रदेश र विभागीय टोलीबाट व्यवसायिक क्रिकेट खेलिरहेका ८ जना खेलाडी राष्ट्रिय टोलीमा समावेश भएका छन । जसमध्ये बिन्दु रावल,कविता कुँवर र रेवती धामी सुदूरपश्चिम प्रदेशबाट नियमित घरेलु क्रिकेट खेलिरहेका छन भने ईश्वरी बिस्ट र सम्झना खड्काले यसैवर्ष क्यानबाट मान्यता पाएको त्रिभुवन आर्मी क्लबबाट खेलिरहेका छन । यी दुवै खेलाडीले अघिल्लो वर्षसम्म सुदूरपश्चिम प्रदेशबाटै राष्ट्रिय स्तरका प्रतियोगीता खेलेका थिए । त्यस्तै राजमती ऐरी र कविता जोशीको घर पनि सुदूरपश्चिम नै हो ।
उनीहरु दुवैजना विभागीय क्लब एपिएफबाट व्यवसायिक क्रिकेट खेलिरहेका छन । माघ १२ गते फाप्लामा सम्पन्न प्रधानमन्त्री कप राष्ट्रिय प्रतियोगीतामा उत्कृट बलर घोषित भएकी मनिषा उपाध्याय पनि सुदूरपश्चिम कै हुन । उनी पछिल्लो समय बाग्मती प्रदेशबाट व्यवसायिक क्रिकेट खेलिरहेकी छन । सुदूरपश्चिम प्रादेशिक क्रिकेट संघ क्यानका अध्यक्ष बाशुदेव जोशीले जुनसुकै प्रदेश वा विभागबाट खेल्दापनि सुदूरपश्चिम भनेर नाम जोडिएर आउँदा आफूलाई खुशी लाग्ने गरेको बताए । उनले महिला राष्ट्रिय क्रिकेट टोली बलियो बनाउन सुदूरपश्चिम प्रदेशको विशेष भूमिका रहेको बताएका छन ।
नेपालले जनवरी ३०,फेब्रुअरी २ र ५ मा नेदरल्यान्ड्स तथा, फेब्रुअरी १, ४ र ७ मा थाइल्यान्डको सामना गर्नेछ । नेपाल क्रिकेट संघ क्यानले धनगढीको फाप्ला खेल मैदानमा गत माघ १ गतेदेखि १२ गतेसम्म प्रधानमन्त्री कप महिला राष्ट्रिय टि२० प्रतियोगीता आयोजना गरेको थियो ।
नेपालले पहिलो खेल उद्घाटनकै दिन नेदरल्याण्ड्ससँग खेल्नेछ । सिरिजमा सहभागी टोलीले एकअर्कासँग ३ पटक खेल्नेछन् । लिग चरणको अंक तालिकाको शीर्ष स्थानमा रहने टोली विजेता बन्नेछ ।
