३१ श्रावण,२०८२ः जलवायु परिवर्तनसम्बन्धी संयुक्त राष्ट्रसङ्घीय संरचना महासन्धिका पक्ष राष्ट्रहरूको ३०औँ सम्मेलन (कोप–३०) का लागि नेपालले तयारी शुरु गरेको छ । कोप ३० आउँदो कात्तिक २४ देखि मङ्सिर ५ गतेससम्म ब्राजिलको बेलेममा आयोजना हुनेछ ।
वन तथा वातावरण मन्त्रालयले हिजो नेपालका लागि ब्राजिलका राजदूत सहित विकास साझेदारका प्रतिनिधिसहितको बैठक गरी कोप–३० को तयारी थालेको हो । यस वर्षको सम्मेलन जिवाश्म इन्धनको खपत विस्थापन, वन, समुद्र र जैविक विविधता संरक्षण अभिवृद्धि, कृषि र खाद्य प्रणालीको रुपान्तरण लगायत विषयमा छलफल केन्द्रित हुने छ ।
नेपालले गएको जेठमा सम्पन्न सगरमाथा संवादका निष्कर्ष ‘सगरमाथा आह्वान’ को हिमाल संरक्षणलगायत विषयलाई उठाउने तयारी थालेको छ । यस्तै जलवायु वित्तमा नेपालको पहुँचसहित विकसित देशहरुले जलवायु वित्त कोषमा गर्नुपर्ने लगानीका बारेमा पनि नेपालले कुरा प्रस्तुत गर्ने छ ।
नेपाल विश्वव्यापी जलवायु परिवर्तनका कारण उच्च जोखिममा रहेको देशमध्येमा पर्दछ । जलवायु परिवर्तनको असर विशेष गरी हिमाली क्षेत्रमा हिमताल पग्लने र विस्फोट हुने, पहाडी क्षेत्रमा पहिरो र तराई मधेशमा सुक्खा खडेरी देखिन थालेको छ । कोप–३० मा नेपालबाट राष्ट्रप्रमुख वा सरकार प्रमुख तहको उच्चस्तरीय सहभागिता जनाउने गरी तयारी गरेको वन मन्त्रालयले जनाएको छ ।
यो खबर पढेर तपाईलाई कस्तो महसुस भयो?
