२४ भाद्र,२०८२ः आन्दोलनरत जेनजी पुस्तालाई काठमाडौं महानगरका मेयर बालेन शाहले सेनासँग वार्तामा बस्न तयार रहन आग्रह गरेका छन्।उनको यो वक्तव्य जेनजी आन्दोलन चर्किँदै राज्यका संवेदनशील संरचनासम्म फैलिएको समयमा आएको हो।
बालेनको भनाइ केवल सुझाव मात्र नभई आन्दोलनको आगामी दिशा निर्धारण गर्ने निर्णायक संकेतका रूपमा हेरिएको छ। उनले संवादलाई विकल्पका रूपमा अघि सारे पनि आन्दोलनकारी भित्री तहमा विभाजित छन्। कतिपय तत्काल वार्ता गर्न इच्छुक देखिँदा, अन्य केही समूह अझै सडक दबाब जारी राख्ने पक्षमा छन्। यसबीच राज्यका तीनै अंग (संसद, सिंहदरबार र सर्वोच्च अदालत) आन्दोलनकारीको नियन्त्रणमा पुगेको घटनाले शक्ति–सन्तुलन पूर्ण रूपमा हल्लिएको छ।

यस्तो परिस्थितिमा सेनासँगको सम्भावित वार्ताले दुई प्रभाव पार्न सक्छ –पहिलो, तत्काल हिंसात्मक टकराव रोक्ने अवसर; दोस्रो, जेनजी आन्दोलनलाई सैन्य–राजनीतिक स्वरूपतर्फ धकेल्ने जोखिमविशेषज्ञहरूका अनुसार, सेनासँग प्रत्यक्ष संवाद गर्ने प्रक्रियाले नेपालमा परम्परागत राजनीतिक नेतृत्वलाई कमजोर बनाउने खतरा पनि बोकेको छ।

यदि वार्ता सफल भयो भने जेनजी आन्दोलनलाई संस्थागत मोडतर्फ लैजान सकिन्छ; तर असफल भएमा राज्य–युवापुस्ता टकराव अझ गहिरिन सक्नेछ।
अहिलेको अवस्थामा बालेनको वक्तव्य जेनजी र राज्यबीच संवादको पुल बन्न सक्छ, तर यसलाई कसरी व्यवस्थापन गरिन्छ भन्नेमा नेपालको आगामी राजनीतिक स्थिरता टेकेको देखिन्छ।

यो खबर पढेर तपाईलाई कस्तो महसुस भयो ?