जेष्ठ २२,धनगढी : धनगढी ५ हसनपुरमा रहेको वाल्मीकि इण्टरनेसनल स्कुलमा विद्यार्थी परिषदको निर्वाचन सम्पन्न भएको छ । शुक्रबार विद्यालयको प्रांगणमा सम्पन्न उक्त विद्यार्थी परिषदको निर्वाचनबाट कक्षा १० का छात्र आरभ तिवारी १९४ मत ल्याएर सभापतिमा विजयी भएका छन । उनका निकटतम प्रतिद्वन्दी अमुल्य चौधरीले ९४ मत प्राप्त गरे । त्यसैगरी शंख,त्रिशुल बज्र र चक्र सदनका कप्तान र उपकप्तान एव कक्षा प्रतिनिधिहरुको पनि निर्वाचन सम्पन्न भएको विद्यालयका प्रिन्सिपल द्रोणाशिष न्यौपानेले जानकारी दिए । निर्वाचनमा कक्षा ३ देखि कक्षा १० सम्मका विद्यार्थीहरुको सहभागिता रहेको थियो ।

निर्वाचनको परिवेक्षकको रुपमा सुदूरपश्चिम प्रदेश निर्वाचन कार्यालयका प्रमुख प्रेमराज भट्टको पनि सहभागीता रहेको थियो । विद्यार्थीहरुलाई निर्वाचन भनेको के हो,भोट कसरी हालिन्छ यस प्रक्रियामा कसरी सहभागीता जनाउन सकिन्छ भन्ने बारे विद्यार्थीहरुलाई व्यवहारिक ज्ञान हाँसिल होस भन्नका लागि पछिल्लो ३ वर्षदेखि विद्यार्थी परिषदको निर्वाचन गराउँदै आएको विद्यालयका प्रिन्सिपल द्रोणाशिष न्यौपानेले जानकारी दिए ।

प्रिन्सिपल न्यौपानेले विद्यार्थी परिषदको निर्वाचन पश्चात विद्यार्थीहरुमा नेतृत्व क्षमताको विकास भएको र उनीहरुले आफ्ना मागहरु प्रशाासन समक्ष निर्धक्कका साथ राख्ने गरेको पनि बताएका छन ।

यो खबर पढेर तपाईलाई कस्तो महसुस भयो ?

गणतन्त्र दिवसको अवसरमा आयोजित आधारभुत तह स्तरीय वादविवाद प्रतियोगीतामा एक्सिस विद्याश्रमकी नम्रता जोशी प्रथम भएकी छन । शुक्रबार कैलाली जनपुस्तकालयले १९औं गणतन्त्र दिवसको अवसरमा आयोजना गरेको मोबाइल फोन वरदान की अभिषाप भन्ने शिर्षकमा १८ जना प्रतिस्पद्धिलाई पछि पार्दै कक्षा ८ की छात्रा जोशी प्रथम भएकी हुन । उनले नगद रु ३ हजार पाँच सय,कैलाली जनपुस्तकालयको वार्षिक मुखपत्र मालिका र प्रमाणपत्र प्राप्त गरिन । अत्यन्तै सटिक विश्लेषण र उत्कृष्ट शब्द चयनका कारण नम्रताको प्रस्तुति निकै रोचक देखिएको थियो ।

त्यस्तै अत्तरीयामा रहेको साधनापथ एकेडेमीका डेबिट अवस्थीले दृतिय स्थान हाँसिल गरेका छन । उनले नगद रु २ हजार पाँच सय र कैलाली जनपुस्तकालयको वार्षिक मुखपत्र मालिका र प्रमाणपत्र प्राप्त गरे । वादविवाद प्रतियोगीतामा तेश्रो स्थान नेपाल प्रहरी स्कुल धनगढीकी छात्रा दिपीका भण्डारीले हात पारिन । उनले नगद एक हजार पाँच सय र कैलाली जनपुस्तकालयको वार्षिक मुखपत्र मालिका र प्रमाणपत्र प्राप्त गरे भने शैलेश्वरी ई बो.स्कुल जाइँका छात्र रोहित बिस्टले सान्तवना स्थान हात पारे । उनले नगद एक हजार कैलाली जनपुस्तकालयको वार्षिक मुखपत्र मालिका र प्रमाणपत्र प्राप्त गरे । विजेता चारै जनालाई कथाकार पुस्पराज पाण्डेयको हालसालै बजारमा आएको कथासंग्रगह किनार स्वयम लेखकले एक एक प्रति प्रदान गरे ।

वादविवाद प्रतियोगीताको निर्णायकमा कमल राज जोशी,पुस्पराज पाण्डेय,विनोद बहादुर सिंह र समय पालकमा तेज राज कापडी रहेका थिए ।

वादविवाद प्रतियोगीतामा धनगढी र गोदावरीका संस्थागत र सामुदायिक विद्यालयका गरी १८ विद्यालयका विद्यार्थीहरुको सहभागिता थियो ।

कैलाली जनपुस्तकालयका अध्यक्ष शिवराज ओझाको अध्यक्षतामा सम्पन्न उक्त कार्यक्रमको प्रमुख अतिथिमा नेपाल प्रज्ञा प्रतिष्ठानका प्राज्ञ सभा सदस्य तथा साहित्यकार बाशुदेव पाण्डेय रहेका थिए भने अन्य साहित्यकारहरुको पनि उपस्थिति रहेको थियो । कार्यक्रममा स्वागत मन्तव्य प्रबन्ध समिति सदस्य डिल्लीराज ओझा समर्पणले गरेका थिए भने सञ्चालन पुस्तकालयका सचिव सुवास संकल्प भण्डारीले गरेका थिए ।

यो खबर पढेर तपाईलाई कस्तो महसुस भयो ?