नीजि तथा आवासीय विद्यालयहरुको संगठन प्याब्सनको आयोजनामा हुन गैरहेको यु-१५ प्याब्सन क्रिकेट लिगका लागि सुदूरपश्चिम प्रदेशको टोलीमा पर्न सफल विद्याभुषण पब्लिक स्कुलका खेलाडि विज्ञान बोहोराको बिदाई गरिएको छ । सोमबार विद्यालयको प्रांगणमा संस्थापक प्रिन्सिपल डिकेन्द्र जंग कुँवरले बोहरालाई टिका माला लगाउँदै बिदाई गरेका हुन ।
विद्याभुषणमा कक्षा ७ मा अध्ययनरत बोहोराले गत पौषमा विद्यालयले जितेका तीन ओटा उपाधिमा महत्वपूर्ण प्रर्दशन गरेका थिए । उनी पछिल्लो समय उत्कृष्ट लयमा रहेका खेलाडी हुन । प्रदेशको टोलीमा आफ्नो विद्यालयको खेलाडी पर्नु विद्यालयका लागि निकै गर्वको विषय रहेको भन्दै संस्थापक प्रिन्सिपल कुँवरले विज्ञानले राम्रो प्रर्दशन गर्नेमा आशावादी रहेको बताए ।
टोलीमा विज्ञानसँगै अनिल रावत,नरेश सुनार,आगेन्द्र साउँद,धिरेन्द्र न्यौपाने,अंकित चन्द,सागर बिस्ट,आयुष सिंह पुजारा,विराट सिंह,सुदर्शन पन्त,निरज भट्ट,सुरज खडायत,निरज भट्राई र मनोज चन्द छनोट भएका छन । वैकल्पिक खेलाडि रोयल ढकाल,विशाल चन्द,विवेक साउँद र आदर्श थापा रहेका छन ।
सुदूरपश्चिम प्रदेशले माघ २८ गते बाग्मती प्रदेशसँग खेल्दै प्रतियोगीताको सुरुवात गर्नेछ । त्यस्तै माघ २९ गते मधेश प्रदेश र फाल्गुन ४ गते कर्णाली प्रदेशसँग प्रतिस्पर्धा गर्नेछ ।
यही माघ २८ देखि फागुन ६ सम्म तल्लो मूलपानी मैदानमा प्रतियोगिता आयोजना गरिने आयोजक प्याब्सन काठमाडौंले जनाएको छ । टि ट्वान्टी–२० फम्र्याटमा हुने प्रतियोगिता लिगकम नकआउटका आधारमा खेलाइने छ । त्यसमा आठ टिमले प्रतिस्पर्धा गर्नेछ । सात प्रदेशको टोली र आयोजक टोलीको सहभागिता रहनेछ ।
प्रतियोगिताको विजेता टिमले १ लाख ५० हजार तथा उपविजेताले ७५ हजार रुपैयाँ पुरस्कार प्राप्त गर्नेछन् । हरेक खेलका म्यान अफ द म्याच खेलाडीले २ हजार ५ सय, उत्कृष्ट ब्याटर र बलरले जनही ५ हजार तथा सर्वोत्कृष्ट खेलाडीले १० हजार रुपैयाँ पुरस्कार प्राप्त गर्ने प्रतियोगिताका संयोजक धनबहादुर पुनले बताए ।
यो खबर पढेर तपाईलाई कस्तो महसुस भयो?
