३भाद्र २०८२ः सामाजिक सञ्जालको दुरुपयोग रोकथाम र पत्रकारितामा मर्यादा कायम गर्न सर्वोच्च अदालतले आदेश जारी गरेको छ। अदालतले सामाजिक सञ्जाल र मिडियाको गतिविधि नियन्त्रण र नियमन गर्न सरकार तथा सम्बन्धित निकायलाई स्पष्ट निर्देशन दिएको हो।
अदालतको आदेश अनुसार नेपालमा दर्ता भएका सामाजिक सञ्जाल मात्र प्रयोग गर्न दिने व्यवस्था मिलाउनुपर्नेछ। फेक आइडी, चरित्रहत्या तथा दुरुपयोग रोक्नका लागि ठोस कानुन निर्माण गर्नुपर्ने निर्देशन समेत दिएको छ।
त्यसैगरी, कन्टेन्ट नियमन, अनुगमन र आवश्यक कारबाहीको दायरामा ल्याउनुपर्ने अदालतको आदेशमा उल्लेख छ। अभिव्यक्ति स्वतन्त्रता संवैधानिक सीमाभित्र रहनुपर्ने र यसलाई गलत उद्देश्यका लागि प्रयोग गर्न नदिइने अदालतको स्पष्ट धारणा छ।
फैसलाअघि वा पछि मिडिया ट्रायल गर्नु अदालतको अवहेलना मानिने विषयमा अदालतले सावधानीपूर्वक संकेत गरेको छ। अदालतको अवहेलनामा हदम्याद लागू नहुने भन्दै प्रेसलाई सीमा बुझ्न अवगत गराइएको छ।
सामाजिक सञ्जाल प्रयोगकर्तालाई जवाफदेही बनाउन नियमनका कदम चाल्नुपर्नेमा अदालतले जोड दिएको छ। साथै, प्रेस काउन्सिललाई पत्रकारलाई मर्यादित र जिम्मेवार बनाउन तालिम सञ्चालन गर्न निर्देशन दिएको छ।
यो खबर पढेर तपाईलाई कस्तो महसुस भयो?
