जेठ २१,धनगढी : १८ वर्षपछि इण्डियन प्रिमियर लिग (आइपिएल) २०२५ को उपाधि रोयल च्यालेन्जर्स बेंगलुरु (आरसिबी) ले जितेको छ । मंगलबार राति सम्पन्न फाइनल खेलमा पञ्जाब किंग्सलाई ६ रनले हराउँदै आरसिबीले पहिलोपटक आइपिएल उपाधि जितेको हो ।

आरसिबीले चौथो प्रयासमा उपाधि जितेको हो । उसले सन् २००९, २०११ र २०१६ को आइपिएल फाइनलमा स्थान बनाएको थियो । तर, ती तीनवटै फाइनलमा आरसिबी पराजित भयो ।यसपालि भने उसले वर्षौंदेखिको उपाधि खडेरी तोड्यो ।

९ वर्षपछि फाइनल खेलको पञ्जाबको उपाधि सपना भने फेरि अधुरै रह्यो । उसले दोस्रोपटक फाइनलमा स्थान बनाएर पनि उपाधि जित्न नसकेको हो ।पञ्जाबले पछिल्लोपटक सन् २०१४ को आइपिएल फाइनल खेलेको थियो । उक्त फाइनलमा पञ्जाब कोलकातासँग पराजित भएको थियो । र, उसले त्यो क्रम २०२५ मा पनि दोहोर्यायो ।

यसपालि फाइनलमा आरसिबीले दिएको १ सय ९१ रनको लक्ष्य पछ्याएको पञ्जाबले निर्धारित २० ओभरमा ७ विकेट गुमाएर १ सय ८६ रन मात्र बनाउन सक्यो ।उसका लागि शशांक सिंहले अर्धशतकीय पारी खेले पनि टिमलाई जित दिलाउन सकेनन् । उनले ३० बलमा ६ छक्का र तीन चौकासहित अविजित ८१ रनको पारी खेलेका हुन् ।

यस्तै, जोस इंग्लिसले ३९, प्रभसिमरन सिंहले २६, प्रियांस आर्यले २४ र नेहाल बधेराले १५ रन जोडे । आरसिबीका लागि भुवनेश्वर कुमार र कृणाल पाण्ड्याले दुईरदुई तथा जोस हेजलउड, रोमारियो सेफर्ड र यस दयालले एकरएक विकेट लिए ।

त्यसअघि गुजरातको अहमदाबादस्थित नरेन्द्र मोदी स्टेडियममा टस हारेर ब्याटिङको निम्तो पाएको आरसिबीले निर्धारित २० ओभरमा ९ विकेट गुमाएर १ सय ९० रन बनायो ।उसका लागि पूर्वकप्तान विराट कोहलीले ३५ बलमा तीन चौकासहित सर्वाधिक ४३ रन बनाए ।

यस्तै, कप्तान रजत पाटिदारले २६, लियाम लिभिङस्टोनले २५, मयंक अग्रवाल र जितेश शर्माले २४र२४, रोमारियो सेफर्डले १७ र फिल साल्टले १६ रन जोडे ।पञ्जाबका लागि कायल जेमिसन र अर्शदीप सिंहले तीनरतीन तथा अज्मतुल्लाह ओमारजाई, विजयकुमार वैशाख र युजवेन्द्र चहलले एकरएक विकेट लिए ।

यो खबर पढेर तपाईलाई कस्तो महसुस भयो ?