११ भाद्र २०८ः दक्षिण एसियाली फुटबल महासंघ (साफ) यु–१७ च्याम्पियनसिपमा नेपालले दोस्रो लेगको प्रतिस्पर्धामा बुधबार साबिक विजेता बंगलादेशसँग प्रतिस्पर्धा गर्दैछ । थिम्पुस्थित चाङ्लिमिथाङ रंगशालामा खेल नेपाली समय अनुसार दिउँसो २ः४५ बजे हुनेछ ।
आइतबार सम्पन्न बंगलादेशसँगको पहिलो लेगमा नेपाल ३–० ले निराश बनेको थियो । त्यसअघि पहिलो खेलमा भारतसँग ७–० ले पराजित नेपालले दोस्रो खेलमा भुटानमाथि २–१ को पुनरागमन जित हासिल गरेको थियो । पछिल्ला तीन खेलमा भारतले स्पष्ट ९ अंक बटुलेको छ । त्यसैले उपाधि समीकरणमा टिकिरहने हो भने नेपाललाई जितको विकल्प छैन । हारले नेपालको उपाधि सम्भावना सकिनेछ ।
पहिलो लेगमा भारतसँग निराश बनेको बंगलादेश भने नेपाललाई हराएर उपाधि सम्भावनालाई बलियो बनाउन चाहन्छ । नेपालविरुद्ध दुई दिनको आरामपछि मैदानमा उत्रिरहँदा बंगलादेशको लक्ष्य बढीभन्दा बढी गोल गर्ने हुनेछ । तुलनात्मक रुपमा बलियो बंगलादेशले खेलको ४१औं मिनेटमा अग्रता लिएको थियो । स्ट्राइकर थुइनुए मार्माले पेनाल्टी बक्सभित्र अनियन्त्रित नेपालको रक्षापङ्क्तिको फाइदा उठाउँदै बललाई टप कर्नरको जाली चुमाईन् । त्यसअघि दुई पटक बंगलादेश गोलको निक्कै करिब आएर पनि अग्रता लिनबाट बञ्चित बनेको थियो ।
गोलको डेडलक तोडिएको चार मिनेटपछि नै बंगलादेशले अग्रतालाई दोब्बर बनायो । निर्धारित हाफको अन्तिम मिनेटमा नेपाली टोली सम्हालिन सकेन । थ्रो इनबाट सृजित स्ट्राइकार अल्पि अक्तरको आक्रमणलाई गोलकिपर लक्ष्मी ओलीले बक्स बाहिर आएर बचाउन कोशिश गरेकी थिइन् । जसमा उनी असफल भइन् । त्यसपछि अर्का स्ट्राइकर सौरभी अकान्दा प्रीतिले खाली पोस्टमा सहज गोल गरिन् ।
दोस्रो अल्पिलाई प्रतिस्थापन गर्दै मैदानमा प्रवेश गरेकी मिडफिल्डर रेयाले निर्धारित ९० मिनेटपछिको इन्जुरी समयमा सुन्दर गोल गर्दै बंगलादेशलाई जित दिलाए । रेयाले गोलका लागि प्रहार गर्नुअघि लक्ष्मी र राइट ब्याक ग्यान्सु डोल्मा लोलाई छक्याएकी थिइन् ।
दुई गोलले पछाडि परेको अवस्थामा नेपाल दुई पटक गोलको निक्कै करिब पुगेको थियो । ५५औं मिनेटमा उप–कप्तान सहारा लिम्बूले बक्स भित्रबाट गरेको राइट फुटेड प्रहार गोलपोस्टमा लागेर बाहिरिएको थियो । उनका सेन्ट्रल मिडफिल्ड जोडी रवीना बिकको सुन्दर थ्रु पासमा नेपालले बंगलादेशसामू पहिलो खतरा बुनेको थियो ।
चार मिनेटपछि नेपालले गोलको उपहारलाई खेरा फाल्यो । यसपाली सहाराले ‘वान भर्सेस वान’मा गोलकिपर मोसम्मत येर्जन बेगुमलाई ‘बिट’ गर्न सकिनन् । पहिलो हाफमा स्ट्राकयर यमकुमारी बिकलाई प्रतिस्थापन गर्दै मैदानमा प्रवेश गरेकी मिडफिल्डर दिकी स्याङबो लामाले सहारालाई सुन्द्यर थ्रु पास मिलाइदिएकी थिइन् । सहाराले पनि बंगलादेशको ‘अफसाइड ट्रयाप’लाई बिट गरेकी थिइन् । तर, अन्तिम टच भारी भएपछि नेपालले पुनः एकपटक गोल फर्काउन सकेन । यो नै गोलका लागि नेपालले बुनेको अन्तिम आक्रमण थियो ।
बंगलादेशविरुद्ध दोस्रो लेगका लागि नेपाली टोलीले मंगलबार अन्तिम प्रशिक्षण सत्र पूरा गरेको थियो । शुक्रबारको खेलका लागि टोली तयार रहेको सेन्ट्रल मिडफिल्डर रवीना (बिक)ले बताइन् ।
‘डिफेन्स लाइनमा हाम्रो कम्युनिकेशन ग्याप देखिएको थियो । जसलाई हामीले भोलिको खेलमा सुधार्नेछौं । हामीले यसअघि गरेका गल्तीहरुलाई सच्याएका छौं,’ रवीनाले भनिन्, ‘पाएको अवसरलाई सदुपयोग गर्ने हो भने जित सम्भव छ ।’
दिनको दोस्रो खेलमा भारतले भुटानको सामना गर्नेछ । पहिलो लेगमा भारतले भुटानलाई ८–० ले हराएको थियो । भारतविरुद्ध हार बेहोरे भुटान उपाधि समीकरणबाट बाहिरिनेछ ।
