धनगढी रंगशालामा जारी बद्री कुन्ता मेमोरियल यु१६ कैलाली जिल्लास्तरीय पुरुष फुटबल प्रतियोगीतामा फारवेष्ट पशुपति क्लब धनगढीलाई पराजित गर्दैै बागमारा स्पोटर्स क्लब लम्की सेमिफाइनलमा प्रवेश गरेको छ ।
उपाधि दाबेदार मानिएको फारवेष्ट पशुपति क्लब धनगढीलाई बागमारा स्पोटर्स क्लब लम्कीले ४ – १ गो अन्तरले पराजित गर्दै सेमिफाइनलको स्थान सुनिश्चित गरेको छ । पहिलो खेलमा फारवेष्ट पशुपति युवा क्लबले बर्दगोरिया स्पोटर्स एण्ड इभेण्टसलाई २ – ० को गोल अन्तरले पराजित गर्दै उत्कृष्ट सुरुवात गरेपनि आजभने सोचेअनुसारको खेल प्रर्दशन गर्न सकेन ।
बागमारा स्पोटर्स क्लबका लागि पहिलो हाफको ४ मिनेटमै अनमोल बुढा क्षेत्रीले गोल गर्दै शानदार सुरुवात दिलाएका थिए । त्यसपछि थप एक मिनेटमै अनिल पुरीले गोल गर्दै टिमको अग्रता दोब्बर बनाए । पहिलो हाफको २६औं मिनेटमा जिवन नेपालीले गोल गर्दै बागमारा स्पोटर्स क्लबको अग्रता तेब्बर बनाए । उनी म्यान अफ दी म्याच घोषित भए ।
दोश्रो हाफको ७१औं मिनेटमा बागमारा स्पोटर्स क्लबका लागि लक्ष्मण सिजालीले टिमका लागि थप एक गोल गर्दै टिमको जित सुनिश्चित गरे । फारवेष्ट पशुपति क्लब धनगढीका लागि बिपिन सिंहले खेलको ८८औं मिनेटमा सान्त्वना गोल फर्काए । बागमारा स्पोटर्स क्लब लम्कीले पौष २४ गते सेमिफाइनलमा अब संघर्ष स्पोटर्स क्लब गोदावरीको सामना गर्नेछ ।
कैलाली जिल्ला फुटबल संघको आयोजना र बद्री कुन्ता मेमोरियल ट्रस्टको मुख्य प्रायोजनमा सञ्चालन भइरहेको प्रतियोगितामा जिल्लाभरका स्थानीय तहका टोली सहभागी छन्।पुस २६ गतेसम्म चल्ने प्रतियोगिताको विजेताले नगद २ लाख रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले नगद १ लाख रुपैयाँसहित मेडल र प्रमाणपत्र पाउनेछ ।
साथै विधागत उत्कृष्ट खेलाडीलाई पनि पुरस्कार प्रदान गरिने प्रतियोगिता निर्देशक हर्क दानपालीले जानकारी दिए ।
यो खबर पढेर तपाईलाई कस्तो महसुस भयो?
