गजल नम्बर : एक
म जान्दिन के सम्झिएर जिन्दावाद भन्नुहुन्छ।
कसैले दिने सराब पिएर जिन्दावाद भन्नुहुन्छ।आँखा खोल्दा देश रित्तिसकेको हुनेछ भोलि,
अझै आँखा चिम्लिएर जिन्दावाद भन्नुहुन्छ।आफ्नाहरू भेटिए के भन्नुहुन्छ होला तपाईं?
दुश्मनहरुसँग मिसिएर जिन्दावाद भन्नुहुन्छ।ज-जसले काँडा राख्दैछ हजुरको पैतलामा,
उसैलाई फूलमाला दिएर जिन्दावाद भन्नुहुन्छ।के रिसाउनु र हजुरसँग आज मुर्दावाद भन्दा,
भोलि सबैकुरा बिर्सिएर जिन्दावाद भन्नुहुन्छ।
गजल नम्बर दुई
यही न हो गाँठो नखोले पनि खोले पनि।
मन बाँध्न नसक्ने रहेछ अंगालोले पनि।बाँचुन्जेल कहिलेकाहीँ बोल्दै गर बाबू,
एकदिन बोल्न सक्दिन तिमी बोले पनि।तिमीलाई पनि त दुनियाँको डर रहेछ,
जुत्ता फुकाल्न सकेनौँ खुट्टा पोले पनि।नचिनेकालाई कसले राख्छ र छातीमा,
उसले के गर्ला राखेन भने माटोले पनि।नत्र किन यसरी राजी हुँदो हो र जल्न,
अगेना मेरै हो भन्दो हो अगुल्टोले पनि।
गोरखामा जन्मिएका गजलकार प्रदिप रोदन पछिल्लो पुस्ताका सर्वाधिक लोकप्रिय गजलकार हुन । पेशाले रोदन शिक्षक हुन । गजल वाचनकै लागि उनलाई देश तथा विदेशमा निमन्त्रणा गर्ने गरिन्छ । मिठा मर्मस्पर्षी शव्द लेखन र आकर्षक वाचन शैलीका कारण उनी जहाँ गजल वाचन गर्न जान्छन त्यहाँ भिड लाग्ने गरेको छ ।
रोदनको अघिल्लो वर्ष मात्रै मफलर गजल संग्रह बजारमा आएको थियो । जो अहिलेसम्मका गजल कृर्तिमध्येमै लोकप्रीय बन्यो । सो गजल संग्रह फाइन प्रिन्टले बजारमा ल्याएको थियो । नेपाली साहित्यको सबैभन्दा लोकप्रिय पुरस्कार मदन पुरस्कारको श्रेष्ठ सूचिमा पनि उनकोे गजल संग्रह मफलर परेको थियो ।
यो खबर पढेर तपाईलाई कस्तो महसुस भयो?
