२२श्रावण,२०८२ः सुदूरपश्चिम प्रदेशमा ३ दिनदेखि लगातार वर्षा भइरहेको छ। मनसुन सुरु भएको लामो समयपछिको लगातारको झरीले बर्षेबालीमा जुटेका किसानलाई राहत पुगेको छ।
कृषि ज्ञान केन्द्र कैलालीका सहायक कृषिप्रसार अधिकृत मदनराज जोशीका अनुसार ढिलै भए पनि यतिबेलाको बर्षाले किसानहरुलाई राहत भएको छ। खासगरी धान, मकै, कोदो र उखु लगायतका बर्षेबालीलाई ढिलो गरी पानी परे पनि राहत मिलेको छ। उनले यस वर्ष छिटो धान रोपाइँ सुरु भएको अवस्थामा निरन्तर पानी नपर्दा किसानहरु बर्षेबाली प्रभावित हुने चिन्तामा रहेको बताए। उनले भने, ‘यही गतिले निरन्तर वर्षा भएमा धानबालीलाई राम्रो हुने सम्भावना बढेको छ।’
यसैबीच कैलालीको अत्तरियास्थित जल तथा मौसम विज्ञान कार्यालयका प्रमुख सञ्जयकुमार शाहका अनुसार आगामी केही दिनहरुमासमेत तत्काल भारी वर्षाको सम्भावना नभए पनि न्युनचापीय रेखा सरदर स्थानमै रहेकोले हल्का र मध्यम वर्षा भइरहने छ। ‘मध्यम वर्षाले किसानहरुका लागि थप राहत हुनेछ,’ उनले भने। उनका अनुसार सुदूरपश्चिमका तराई तथा पहाडी सबै जिल्लामा पानी परिरहेको छ।
जल तथा मौसम विज्ञान कार्यालय अत्तरियाको रेकर्डअनुसार यो वर्ष मनसुन नेपालमा केही छिटो जेठ १५ गते नै भित्रिएको हो। कमजोर प्रणालीका कारण जेठ १५ मा भित्रिएको मनसुन फैलिन नपाउँदै डाइभर्ट भएको थियो। दोस्रो चरणमा जेठ २९ गते मनसुन भित्रियो। असार ६गते देखी देशैभरि मनसुन फैलिएपछि वर्षा सुरु भएको हो।
सतह ४ दशमलव ५० मिटर हो। जल तथा मौसम विज्ञान कार्यालय अत्तरियाका अनुसार पछिल्लो २४ घण्टामा कैलालीमा सबैभन्दा बढी पानी चुरे गाउँपालिकाको गर्भा दरबार क्षेत्रमा १३३ दशमलव ४ मिलिमिटर थियो। धनगढी र अत्तरियामा ६२ दशमलव ६ र कञ्चनपुरको दोधारा चाँदनीमा ९२ दशमलव ८ मिलिमिटर पानी परेको थियो।
यो खबर पढेर तपाईलाई कस्तो महसुस भयो?
