धनगढीको फाप्लामा जारी जिल्ला क्रिकेट संघ कैलालीले आयोजना गरेको कैलाली जिल्ला विद्यालय स्तरीय क्रिकेट च्याम्पियनसिपमा लगातार चार खेलमा जित निकाल्दै थ्री स्टार्स बोर्डिङ्ग स्कुल क्वाटर फाइनल प्रवेश गरेको छ ।
मंगलबार सम्पन्न खेलमा थ्री स्टार्सले पञ्चोदय माविलाई २ विकेटले पराजित गर्दै क्वाटर फाइनलको टिकट पक्का गरेको हो । पञ्चोदय माविले दिएको ८५ रनको लक्ष्य थ्री स्टार्सले अन्तिम बलमा ८ विकेट गुमाउँदै पूरा गर्यो । थ्री स्टार्सका कुनैपनि ब्याटरले राम्रो प्रर्दशन नगरिरहँदा खेलको अन्तिममा ब्याटिङका लागि आएका खेमराज भट्टले ४ बलमा ३ चौकाको मद्दतले अविजित १२ रन बनाएर टिमलाई व्वाटर फाइनलको यात्रासम्म पुर्याए ।
पञ्चोदयका लागि नविन केसी र युनिक खातीले समान दुइ दुइ तथा पवन उपाध्याय,सन्तोष थापा र आशिष बिकले समान एक एक विकेट लिए । पञ्चोदयले ३१ रन अतिरिक्त खर्चेको थियो ।
त्यसअघि टस जितेर पहिला ब्याटिङ गरेको पञ्चोदयले निर्धारित १० ओभरमा सबै विकेट गुमाउँदै ८४ रन बनाएको थियो । पञ्चोदयका लागि आयुश ढुँगानाले सर्वाधिक ४३ रन बनाउनु बाहेक अन्य ब्याटरले उल्लेखनीय प्रर्दशन गर्न सकेनन ।
थ्री स्टार्सका योगेश जोशी एक्लैले ४ विकेट चट्काए । २ ओभर बलिङ गरेका जोशीले ९ मात्र ९ रन खर्चिदै ४ विकेट लिन सफल भएका हुन । उनी म्यान अफ दी म्याच पनि चुनिए । त्यस्तै मुकेश बोहराले ३ तथा आकाश बिस्टले २ र कप्तान रबिन्द्र सिंह धामीले एक विकेट लिन सफल भए ।
पछिल्लो समय क्रिकेटमा निकै रुचिका साथ अगाडी बढिरहेको थ्री स्टार्स बोर्डिङ्ग स्कुलले राष्ट्रिय खेलाडी दिपक टमाटालाई मुख्य प्रशिक्षकको रुपमा राखेर नियमित प्रशिक्षण गराइरहेको छ ।
यो खबर पढेर तपाईलाई कस्तो महसुस भयो?
