धनगढीको फाप्लामा जारी सुदूरपश्चिम प्रदेश स्तरीय प्रधानमन्त्री कप एकदिवसिय क्रिकेट प्रतियोगीतामा अछामले पहिलो जीत निकालेको छ । पहिलो खेलमा कैलालीसँग ५८ तथा दोश्रो खेलमा कञ्चनपुरसँग १०८ रनले पराजित भएको अछामले तेश्रो खेलमा भने डोटी विरुद्ध ७ रनको रोमाञ्चक जीत निकालेको हो ।

अछामले दिएको १८५ रनको लक्ष्य पछ्याउने क्रममा डोटी २९.५ ओभरमा अलआउट हुँदै १७७ रनमा समेटियो । डोटीका लागि आयुष खड्काले सर्वाधिक ३६ रन बनाएपनि जितका लागि पर्याप्त भएन । आयुष द्यारियाले २३ रन बनाउँदा पारस महत २२ रनमा अविजित रहे भने डबल ऐरले पनि २२ रनको पारी खेले । अछामका लागि आर्यन बिक,रमेश भट्ट र दिपक शाहीले समान दुई दुई विकेट लिए भने निराजन गौतमको नाममा एक विकेट रह्यो ।

त्यसअघि फाप्ला खेलमैदानमा खराब मौसमका कारण ३० ओभरमा छोट्याइएको खेलमा डोटीले टस जितेर अछामलाई ब्याटिङको निम्तो दिएको थियो । अछामका लागि कप्तान राजु रिजालले अर्धशतक प्रहार गरे । ५३ बलको सामना गरेका उनले ५ चौका र ३ छक्का प्रहार गरे ।

त्यस्तै दिपक टमाटाले अविजित ३२ रनको पारी खेल्दा आशिष लुहारले ३० रन बनाए । २५ रनको योगदान दिएका रमेश भट्ट म्यान अफ दी म्याच चुनिए । डोटीका लागि प्रकाश जोशीले सर्वाधिक ३ विकेट लिए । ६ ओभर बलिङ गरेका जोशीले १ मेडेन राख्दै ४७ रन खर्चेर ३ विकेट लिएका हुन । पारस महतले २ विकेट लिएभने सौर्य श्रेष्ठले पनि किफायति बलिङ गरे । ६ ओभर बलिङ गरेका श्रेष्ठले २ ओभर मेडेन राख्दै मात्र ११ रन खर्चेर १ विकेट लिएका हुन ।

यो खबर पढेर तपाईलाई कस्तो महसुस भयो ?