असार १०,धनगढी : राष्ट्रिय स्कुल क्रिकेट च्याम्पियनसिप अन्तर्गत सुदूरपश्चिम प्रदेश स्तरीय छनोट प्रतियोगीताको उपाधि कैलालीको विद्याभुषण पब्लिक स्कुलले जितेको छ । धनगढको फाप्ला मैदानमा बुधबार सम्पन्न फाइनलमा विद्याभुषणले डोटीको सुजङ बोर्डिङ्ग स्कुललाई १२६ रनको विशाल रन अन्तरले पराजित गर्दै उपाधिमाथि कब्जा जमाएको हो ।
समापन समारोहका प्रमुख अतिथि सुदूरपश्चिम प्रदेशका सदस्य सचिव लोक बहादुर खड्का लगायत अन्य अतिथिहरुले विजेता टोली विद्याभुषण पब्लिक स्कुल र उपविजेता टोली सुजङ बोर्डिङ्ग स्कुललाई ट्रफी तथा प्रमाणपत्र प्रदान गरे ।
टस जितेर पहिला ब्याटिङ गरेको विद्याभुषणले निर्धारित २० ओभरमा ७ विकेट गुमाउँदै २०० रनको विशाल लक्ष्य प्रस्तुत गरेको थियो । विद्याभुषणका लागि प्रकाश माझीले ६२ रनको उत्कृष्ट पारी खेले । त्यस्तै सचिन भट्टले अविजित अर्धशतक हिर्काए भने विज्ञान बोहराले ४३ रनको पारी खेले । सुजङ बोर्डिङ्ग स्कुलका लागि सरोद कठायत र कुश सामलले समान दुई दुई तथा बिमल नागरी र विवेक खड्काले समान एक एक विकेट लिए ।
विद्याभुषणले दिएको २०१ रनको लक्ष्य पछ्याउन गएको सुजङ बोर्डिङ्ग स्कुलले सुरुवात राम्रो गरेपनि नतिजा आफ्नो पक्षमा पार्न सकेन । कप्तान मोहन भट्टले ८ बलमा १७ रनको आक्रामक पारी खेलेपनि अन्य ब्याटरले राम्रो प्रर्दशन गर्न नसक्दा सुजङ बोर्डिङ्ग स्कुल १३.४ ओभरमा सबै विकेट गुमाउँदै ७४ रनमा समेटियो ।
विद्याभुषणका लागि प्रकाश माझी,विज्ञान बोहराले समान दुई दुई तथा कप्तान विवेक दुवाल,रोशन रावल,योगेश जोशी र पियुष बोहोराले समान एक एक विकेट लिए । फाइनलमा अलराउण्ड प्रर्दशन गरेका प्रकाश माझी म्यान अफ दी म्याच चुनिए । प्रतियोगीतामा उत्कृष्ट बलरको अवार्ड कैलालीका योगेश जोशीले जितेभने उत्कृष्ट ब्याटर र सर्वोत्कृष्ट खेलाडीको अवार्ड पनि कैलालीकै प्रकाश माझीले जित्न सफल भए ।
अब विद्याभुषणले आउँदो असार २० गते काठमाण्डौंमा आयोजना हुने राष्ट्रिय स्कुल क्रिकेट च्याम्पियनसिपमा सुदूरपश्चिम प्रदेशको प्रतिनिधित्व गर्दै प्रतियोगीतामा सहभागीता जनाउनेछ ।
सुदूरपश्चिम प्रादेशिक क्रिकेट संघका अध्यक्ष बाशुदेव जोशीको अध्यक्षतामा सम्पन्न समापन समारोहमा प्रमुख अतिथि सुदूरपश्चिम प्रदेशका सदस्य सचिव लोक बहादुर खड्का रहेका थिए । भने क्यानका केन्द्रिय सदस्य बिक्रम बिस्ट,प्रदेश र जिल्लाका पदाधिकारी,विभिन्न विद्यालयका प्रिन्सिपलहरुको पनि उपस्थिति रहेको थियो ।
यो खबर पढेर तपाईलाई कस्तो महसुस भयो?
